كل سنة و ( أنا ).. بخير


ع فكرة اليوم الأحد 18 / 9 ..

أول يوم دوام بالجامعة وأنا بصير سنة ” 5 ” بعين الحسود بالجامعة . كل يوم بصحى الصبح بنشاط .. بالفترة الماضية تعودت ع الكسل ” لأنه الكسل تعويد برضه ” . وصراحة مش حاب أداوم لأسباب كثيرة ” وأفكار وخيالات مجنونة بتلف بعقلي ” أولها أنه أسمي راح يكون رقم ” 1 ” بكشف الحضور والغياب لكل المحاضرات وراح يسألني الدكتور وراح أجاوبه وبعد المحاضرة راح يجي واحد ” فلته “ويسألني نفس سؤال الدكتور ” ليش بعدك ما تخرجت ” ؟ راح أقلهم ” بحب الجامعة وبموت بالعلم أنا ” .. حد اخو مراقي ! أنا من غير حيطان الكلية والحمامات الي مخربش عليها و الناس المبطحة تحت الشجر ووجوه الدكاترة التي ” تشع فرحا وابتساما ” وريحة الخلطة السحرية ” عرق وبرفان ” والنسكافيه الخظ من الكشك ،، ما بقدر اعيش ..

السبب الثاني : أنه صاير عندي عادة صحية جديدة ” والعادة تعويد برضه ” ، ما بحب البوس ” بس بحب القبلة ” ، وإذا بنزل ع الجامعة راح أشوف زيد فراح يهجم عليّ ويبلش بووووس .. راح يشوفنا عبيد .. راح يبوس برضه ” يا خوفي تعويد ” وراح نمشي شوي نروح عالمحاضرة أو الشلة … بعد ساعة أو ثاني يوم راح أرجع أشوف حميد مع زيد وعبيد .. راح تكون حفلة بوس . عشان هيك بحب مصاحبة الصبايا بالجامعة .. لأنه ممنوع البوس .

السبب الرابع : لأنه الثالث مارضي يركب معي .. أنه مش حاب أحمل كتب ” منسوخة من أبحاث ناس مصريين سنة الــ 70 ” والدكتور بدرسها ” أو بسمعها . لأنه تعودت ع التسميع ” على إنها من تأليفه .. ” تعودت احمل قلام وورق .. كاميرات .. لابتوب وهموم كثيرة ” .. لو حملت الكتاب ” إن صح التعبير ” بده يقلي ليش حامل كتابك ما في داعي تجيبه . ولو ما جبته راح يقولي ” زي وأنا بصف رابع جيم ” وين كتابك ؟؟ انت جاي ع جامعة ولا عكرخانه !!

بعدين بتحس حالك بتسمع نفس الشريط من 4 سنين .. الإتصال والتواصل والإتصالات وكيف اتصل ومن أين ولماذا ومتى ” وماذا ” سقطت سهوا ” لأنه طبيعي أني أسهى وأنام كمان بمحاضرة كلها بعبعة من المحاضر .. وإذا لاسمح الله يعني طلب منا ” برزنتيشششششن ” لأنه حاب يعلمنا اسس التقديم والخطابة وقوة الشخصية على ذمته . راح يجيوا الطلاب ” بعد ما يسألونا 20 مرة عن شو بدهم يعملوا ” ويقفوا بأحسن زينتهم ويكل قوة ” يقرأوا صفحتين من الكتاب الي طلبه الدكتور ” كانوا طول الليل ينسخوا فيهم من الكتاب لورق فلسكاب ملوّن .

السبب الخامس :

كل ما تسلم عواحد .. كيف شغلك ؟ كم راتبك ؟ عطوووووووول بدون مقدمات .. وبس تحكيله بطلت شغل .. برجع بده كل التفاصيل .. وإذا غلطت وحكيت قدامه اسم زميل عمل سابق .. بطلع وكأنه الي كتب قصة حياته .. وإذا طنشت وما رديت .. ثاني يوم بيجيلك خبر من أحد الي كانوا بنفس قعدة الغيبة و النميمة أنك ” متكبر وشايف حالك وتبع …. و … آه أنتوا عارفين الباقي .. إذا مش عارفين أبدعوا …. “.

أمّا السادس والسابع والثامن فهمه أسماء ” دواوير ” بطريقي للجامعة ” لما أدافش الركاب لأطلع ولمّا اتصبح بصوت الوكيل والحويان والعمري ” .. ” لمّااطلع من بيتنا الساعة 6 عشان ألحق محاصرة الساعة 9 ” ..

بعدينش راح أختصر الأسباب الباقية .. راح تكون ” شخصية ” … وكل سنة وأنا بخير

Advertisements

13 فكرة على ”كل سنة و ( أنا ).. بخير

  1. انا كنت أكره أول يوم الجامعة لنفس السبب الثاني، كتير مقرف تقوم بالواجب الاجتماعي وخاصه انك مجبور يا بعد قلبهم بشتاقولك لأنه صارلك شهر بس مش شايفتهم وخدلك ع احضان وصوات وازعيق كإنهم شايفين “جمال سليمان” خخخ.

    بعدين ببدأ موجة وجع الراس قديش جبتي بالمادة الفلانية، وقديش طلع تجميعك، وتتراوح رود الفعل حسب النتيجة من حسد الى شماته ههه ما عندنا اي مشاعر نبيلة أنا متأكدة، ثم ننتقل للجدول والكل الكل الله وكيلك بصير بده يسجل معك بنفس الشعبة وهم لا يدرون إنك هارب منهم.

    والله أيام كل سنة وانت بخير … فرصة تشد حيلك وتعتق حالك من الاحتفال الموسمي هاد “:D

  2. شكرا روان .. سيبك هاد حكي الصبايا . أما الشباب ما بسألك عن علاماتك . يمكن يسألك عن صاحبتك الي كانت معك الفصل الماضي . بده يرتب أموره عليها أو على صاحبيتها ..

    إذا بشد حيلي أكثر من هيك بنقطع . الله كريم

  3. محمد زياد

    بتعرف ابو حميد .. جد .. انا بحمد الله اني تخرجت .. مع إني لسا ما اشتغلت و يمكن ما اشتغل و لسا مطول بتعرف انا يا وزير يا لأ و الظايف معبية البلد.. 😀 .. بس جد كلو كوم و لا اسمع صوت الوكيل على الريق .. جد هاد الإشي الوحيد الي الحمد لله خلصت منه من الجامعة .. كلو بهون التفاهات الطلابية و الأسئلة الفضولية الزيادة عن اللزوم و تنكب كاسة النكسافيه على البنطلون كلو بهون .. بس و لا اسمع صوت هالوكيل على الريق …

  4. بتهون أبو زياد . وبتلاقي وظيفة من غير واسطة ولا بهدلة .. مش بالأردن اكيد D:

    الخبر الي طلع بعد كتابة التدوينة | أنه اليوم آخر موعد لدفع الرسوم .. هلا عمي

  5. يا زلمة إنتم بالجامعة، وأنا متشوق تأفوت الجامعة ،

    يله كلها هالسنة وإن شاء الله السنة الجاي على الجامعة ريحين،

    فعلا الله بعينك، لانه الحياة بدها أخد وبدها عطا،

  6. وسن الرنتيسي

    أول إشي هاد أجمل وصف بشوفوا للحالة الجامعية اليرموكية أو الحالة الجامعية بشكل عام… يعني أبدعت محمد … وفعلا معك حق بكل كلمة حكيتها يمكن ما كنت ألاحظها بطريقة جدية بس بعد ما فكرت شوي إكتشفت انها صح ..
    وبالنسبة ليه ما تخرجت لهلا ما رح أسألك هاد السؤال ووين بتشتغل وكم راتبك برضو ما رح أسألك والفلان الفلاني إبن فلان ما رح احكيلك قصة حياتو … بس كم عمرك بعد كل هالتفاصيل أكيد رح أسأل؟ :))

    دمت مبدعا صديقي وإن شاء الله خريجا عما قريب ….

  7. أشكر مروركم بالتحويلة .
    حاتم | بس ما يكون السبب الشخصي هو الي عجبك 🙂
    حمزة | الجامعة حلوة بحلوها ومرها .. شد حيلك بلكي بتداوم معي .

    وسن | سلمت يا صديقتي . يعني سؤالك في محله لأن البعض بفكر أنه تأخرت بالدراسة لهمالتي هههه

    عمري 26 سنة .

  8. ra'fat

    جميل جداً صديقي وليس جديد عليك الابداع سلمت ودامت الحريه لقلمك

سيتم عرض تعليقاتكم بعد قليل . نشكر تفاعلكم

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s