أنا .. هيئة تحرير


قبل أسبوع كنت في بيروت . حضرت دورة نظمها المعهد الديمقراطي الوطني بالتعاون مع أصوات . حول صحافة المواطن . كانت محاور الدورة حول صحافة المواطن مقابل الصحافة التقليدية . وقبلها بسنة كنت بمصر عن نفس القصة. و حكي كبير بوجع الراس عن معضلة الحياد والأخطار المحيطة بالصحفيين وكيفية التنظيم الذاتي والقواعد الأخلاقية في الصحافة وكيفية صياغة قصة إخبارية جيدة .

ولا مرة وحدة خلال المحاضرات بطلت السيدة كيلي أرينا عن توجيه النصائح والأوامر .. أفعل لا تفعل أفعل لا تفعل … قل ولا تقل ..

ولم يمض أسبوع منذ بدء الفصل الدراسي الثاني وانتظام الدراسة في كلية الإعلام بجامعة اليرموك في شباط الي راح . حتى يسألني محمود ” بس أتخرج شو ممكن أشتغل ؟ ”

إنساك انه محمود ما عنده مهارات كافية وخبرات عملية في الصحافة والإعلام و ما عنده واسطة .. الحق عليه عفكرة .. يشوف واسطة قبل تخرجه ، مش هيك قال د . علي انجادات ونحنا سنافر .

أنا سرحت ..

سرحت بحال الطلاب الي بتخرجوا وما بلاقوا شغل مع أنه عنا بالأردن مدينة إعلامية وعنا 28 راديو إف إم حسب ما بعرف .. وعنا فضائيات كمان .. غير الجرايد وشركات الإعلان ، وعنا بطالة . آآآه عنا بطالة

بعدني سرحان ع فكرة ..

وأجتني فكرة .. أنه ممكن كل الشباب يصمموا مواقع الكترونية ” مدونات ” خاصة فيهم . ممكن ما يدفعوا ويعملوها ببلاش .. مع أنه 5 دولار ما بكسروا حد 😀

ومع هيك دورات ” غير شهاداتهم الي معلقة ع الحييييط ” .. ما في داعي نحمل السيرة الذاتية وأعمالنا الفنية والإعلامية وكتب التوصية من الدكتووووووووووور فولان أو علان ونلف سبع دوخات بين مكتب ومكتب .

ممكن بدل كل هالشعتلة والوقفة باب ديوان الخدمة المدنية الي ما وظف ولا صحفي خلال السنين العجاف الي مرقن .. بنحمل كمراتنا ” الي عالموبايل مثلا ” وورق وقلم ولابتوب ” لمن استطاع إليه سبيلا ” وقطعة نت من شركة مليحة وبننزل عالشارع .. وأحسن نفس أرجيلة .. وطجهم الموضوع الي يسطل مخ أحسن مدير تحرير بالبلد .

بالناسبة .. مين أحسن مدير تحرير عنا بالبلد ؟

كيلي طيرت الحلم و فاجأتني بسؤال .. وقالت : من أنت ؟ وين بتشوف حالك ؟ بعد 5 سنين .. بعد 10 سنين .. بعد 20 سنة … ” نفس أسئلة تمرين التخيل في NLP ” .

بعد ما أقر مجلس النواب الأردني قانون المطبوعات والنشر ، وضم المواقع الإلكترونية للقانون باعتبارها مطبوعة لمن يرغب بتسجيلها فقط . فانا أرتئي أنه صار لازم نحل مشكلتنا بأيدينا بعمل مدونات وتكريس مهنة المواطن الصحفي . من غير ما نسمح لأي مؤسسة صحفية أنها تستغلنا تحت اسم متدربين ومتطوعين . وهيك بتمارس المواطنة والصحافة يا كبيرز مرة وحدة .

شباب .. قاعدين بوخدوا دورات كيف يكتبوا خبر وكيف يرفعوا فيديو ع النت .. كيف يكونوا موجودين بالحدث وغيره وغيراته .. مش 4 سنيين وأنا بسمع هالحكي وبعمل فيه واجبات للدكاترة !! كأنوا .. مش !!

مين بنزل ع الشارع وبركب الباص وبشوف الأسعار وبفزع بالطوشة .. مين بروح ع الجامعة ومين بينشحط عالمخفر !! مين الي طفران وميت عوحدة يخطبها . مين الي اشتغل وانفصل . مين الي مش لاقي شغل ؟؟

هو سؤال واحد بس .. مين أحسن هيئة تحرير بالبلد !!

Advertisements

سيتم عرض تعليقاتكم بعد قليل . نشكر تفاعلكم

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s