ضربت اسلاكي ،، دخنة طالعة من تحت ” التابلوه ” وعداد الحرارة حلّق .. طبعا ما بعرف ليش طفت كل الأشياء الكهربا إلاّ الراديو .
تلفون صغير على الكهربجي أو ونش ولحد ما يوصل بنقلّب القنوات .. نجوى كرم بتغني ” معليش بكرا بيفهم معليش بكرا بيندم وبيعرف وبيتعلم … ” ، ومونتيكارلو ” في تفاصيل لما يحدث في بنغازي و كيفيّة إيجاد حل صغير كثقب الإبرة في جدار العنجهية القذافية ” ..
ما عجبني الوضع عالخارجي .. رجعت عالوطني لأنه إحنا كمان عنا مصايب .. في واحد بنافق لمدة 3 ساعات .. الله يقويه ، أنا بقدرش انافق لـ 10 دقايق عبعض ! كيف هو هيك !!
مذيعة المحطة التالية تستضيف دكتور للحديث عن الذكاء اللغوي .. وهو بمعنى آخر نفاق إجتماعي وإستخدام مهارات لغوية لكسب الآخر ،، كسب الآخر لغاية نبيله على ما أعتقد وتنفيذ وإنجاز مهمة قد تكون تجارة أو معاملة ما أو تقديم خدمة .. لكن هذا المتنمق والمتحذلق لماذا يتجاوز اسماعنا ومزاجنا الفيروزي لإتمام الحلقة 632541 من مسلسل الكذبة .
معقول المشكلة بالسلف ! ولا بسلك الدينمو !! مشكلة الأوتوماتيك ما بتعشّق .. وحياتنا صارت توماتيكي ، بتركب الصبح بتحمي السيارة البنزين مثلها مثل الديزل ” ربع ساعة ” وبعدين بتطلع بوجهك قص بالشوارع قبل ما الشرطي يصحى من النوم ويمارس هواية إغلاق الشارع . بتصف مزدوج وبتنزل توقع دخول وبعد هيك روح وين ما بدك .
اتوماتيك بستمع لنشرات الأخبار وللندوات الحوارية والضيوف من جانب واحد ، إما عن قصد او بسبب ضعف فريق المعدين او ” تطنيش ” الضيوف للمذيع والمحطة قبل البرنامج بدقيتين ثنتين .
واتوماتيك نردد كالببغاوات ما نستمع له ونميل له إما لأننا نعرف ونحب ونعجب بشخص المتكلم ” موضوع عاطفة فقط ” أو لجهلنا و اتوماتيكيتنا الملعونة .
نفسي أعشّق الأوتوماتيك ..
وفيوز الرباعي طفا .. يعني كمان النظرية الي بتقول ” فخار يطبّش بعضه المهم أنا بخير والكل يبعد عني وما يقربني ” انتهت .. وممكن حد مسرع يفوت فينا جوووووول بدون ما ننتبه .
الكهربجي شكلوا معارض متشدد ومش عارف غير الكيل بكيلين ،، طلب مني تغيير الجدلة وممنوع النقاش في هيك موضوع .
أنا بقول شغلة فيوزات مش أكثر ،، فيوز المسجل بده تبديل مع فيوز المساحات ..
بنشغل المساحات بالشتا ،، بنستفيد منهم .. وبهيك بصير الراديو يشتغل بوقته وبنسمع الكلام المهم والمفيد وبعيدا عن المنافقين والمضللين وبنعرف الصح وبنتعلم وما بنندم .. تماما مثل توجيهات إدارة السير للسائق في الشتاء .
بنغيّر كمان من فيوزات القوانين و آليات تنفيذها وبنجيب نوع اصلي ما بيخرب مع الشد والمخابطة ..
حتى إذاعة القرآن الكريم بدها تبديل ” الأشرطة ” لأنها صارت قديمة كثير ولازمهم جدلة كهربا من نوع ثاني ..
شكلنا اليوم مش راح نروح عالشغل .. يلعن الكوستر وساعته .. المنحوس منحوس بعرف راح أرجع القى الونش شايلها او متخالف . مع انه الموضوع بس إنا نفهم تركيب الفيوزات ونحافظ على سلامتها
Ta7weleh 
يعني مو عارفة شو أحكيلك لأ يا سيدي المشكلة مو بالفيوزات المتور كله بده تغيير سدقني
المشكلة انه الميكانيكي راكب راسه ومش راضي يفهم ، وما بصير يصلحها الا الميكانيكي كمان عجبك بالله
مش عارف وين المشكله…انا شايفلك تسافر على كوريا احسن عشان هناك بيصلحو السيارات ببلاش ومش فيوزات …بعطوك اشياء كثير احسن ….وبالمره خذ ايناس معك…شو هالموضوع
أشكر للجميع ردودهم .. مؤكد أن التحويلة هذه المرة تحتاج لوقفة وتحليل ويجتاحها الغموض .. اعتقد أن إيناس قد فهمت الرسالة ..
بهاء : ليأخذ فرصته وينجز .. وليترك مذيعوا النفاق آذاننا للصفاء والنقاء .
كابوس : المشكلة عزيزي بدون الغاز إلى اننا لم نفهم تركيبة مجتمعاتنا وطبيعتها وما يلزمها من إصلاح وإنماء .. هناك من يريد أن يقلب الصفحة مرة واحدة او يمزقها .. وهناك من يريد أن يمسح الأخطاء ويكتب مكانها كلاما جميلا .. الصورة في المدونة تبيّن تركيبة المجتمع ” بفيوزاته جميعها ” ولا داعي للعبث بها لتبقى السيارة بخير . أشكرك