ناس وناس


مؤكد لا أكتب عن مجلة أو برنامج إذاعي .. أكتب عن ناس وناس .. أتسائل .. ليش الناس مش الناس ؟

الحكاية إني ركبت ” سرفيس خطه طويـــــــــــل ” وأجرته كمان ” عاليــــــــة ” وانا للصدفة ركبت جنب السائق . وممرنا بجانب مزارع عبقرينو . حيث ينادي من على ظهر سيارته ” المستوفة بكس بندورة ” ألا أيها القوم أسمعوا وعوا : ” البكسة بدينار أردني واحد فقط ” ولن ننزل إلى السوق المركزي لبيع حمولة السيارة ..

مشهد مفرح حقيقة ، الله يرحم أيام ما كانت ” البكسة ” بــ 7 دنانير ، قال السائق مبتسما

عندما ركب شيخ وحرمه السبعينية بجانب الشاب في السيارة .. قال الشيخ : الله يعين الناس ، حتى بدينار غالية . وأذهب عليّ فرحتي بالدينار و منظر ” قلاية البندورة ” الذي سيطر على مخيلتي لتناوله يوم الجمعة .

السائق في بلدي يجيد اقتناص المواضيع وفرض الصور الذهنية السوداء على كل من يركب معه خصوصا إذا ما مررنا بجانب مبنى أمانة عمان الكبرى ..

كلمات الشيخ دفعت السائق لسرد قصص الله أعلم بمدى صدقها .. متوجها إلي ّ : بتصدق وبتآمن بالله – طبعا انا ما فتحت ثمي بكلمة – من شهر مقدم على شغل بالأمانة وبلا مؤاخذه والشغل مش عيـــــــــــب . كسرنا نفسنا لنشتغل ( زبّالين ) وحتى اليوم ما
قبلوني . الزبال حتى مش صاحلنا . والبلد تييييت .

نط على غفلة .. أبو الشباب وقال : ( الزبّال ) أحسن شغله .. بكفي أنه راتبه 340 دينار وغير الي بطلعه ” براني ” وإذا معه واسطة بكون وضعه ” لوووووووووووووولز ” كـ ( زبّال ) في عبدون وأم أذينة والرابية بلحق فوق راتبه عفش وملابس وأكل وإكراميات بما لا يقل عن 10 دنانير كل ما ” كنس وشطف درج عمارة ” .

بقلك مش صاحلي ورحت أقابل حكولي تشتغل بحارتكم . قلتلهم احسن واحسن . و بالهزمن الي بقول عيــــــب ما بعيش . وهالسيارة شو جايبتلي غير الهم .. ( زبّال ) بشتغل للظهر وبوخد حالي وبروح عالبيت بنام .

أثناء هذه الجولة مررنا بأربعة من عمال الوطن الأوفياء . و عند كل واحد كان الحوار يشتد والسائق يقول : شوف شوف كيف .

ناس وناس ..

أجزم أن العامل يقول في داخله ” لو معي سيارة ، لو ارتاح من همّ المراقب وأوامره .. ولو يصيروا الناس يحترموا حالهم شوي ويرموا ( زبالتهم ) بمكانها الصحيح .. شو كان بصير يعني ” ..

ناس وناس ..

بلا قطعان لكلامك يا معلم بتعرف انا شو بشتغل ؟ أنا الله لا يهينك ” معلم مدرسة ” ومتخرج بـ 2009 واشتغلت بواسطة كبيرة .. وبعد الظهر بروح على شركة والله مش ملحق ومش متهني بقرش .. طيب أنا عمري 28 سنة – وهـــــــــــــون فقع الفتيشة وأثار فضول السبعينية – بدي أتجوز .. يالله بدي أتجوز كيف بدي أدبرها !!

نطقت بصوت هادر : ” عشر تالاف نيرة ما بقديك يا ميمتي .. ذهب ومهر وعفش وسيارة وبيت ……… ”

لماذا كبار السن يحبون الحديث في شأن الزواج ؟ لماذا بعدما يمضي على حفل الزواج شهر يسألوك بفضول وحشريّة ” متى بدك تخلف ولد يحمل اسمك ؟ يا ناس هي البنت ما بتحمل اسمي يعني ؟؟

أنا كنت خاطب وفسخت .. لأنه أمها طلبت الجمل بما حمل . قلتلها خليكي عند أمك .. هو من قليل البنات ” دايرات بالشوارع ” : قال .

وتابع السائق باهتمام ” بحبوا سيرة الشوارع ” .. وبلغة المطّلع : بقلك نسبة العنوسة في الأردن بازدياد والطلاق بإزدياد كمان .. طيب شو نعمل بغلاء المهور ؟ يازلمة ( زبّال ) مش صاحلنا .

قالت : الي مش قادر يصرف على مرته وبطلقها ” بوكل خزوق ” لما يدفع نفقة .

قال السائق : بتعرفوا انه الي عليه شيك وكمبيالة ونصب وسرقة بطلع بكفالة والي عليه قضية نفقة إذا ” إنمسك ” الجن الأزرق ما بطلعه .. يا بدفع يا بنحبس .. أسألوني انا .

ناس وناس ..

ناس ناقمة على حياتها وغير راضية عن رزقها و عملها .. ناس لا تتقن في حياتها إلاّ لعنة الظلام و الحسد والغيرة و البغضاء و التكبّر والعنصرية الواضحة في حديث رفاق ” السرفيس ”

* ( زبّال ) كلمة تدل على تحضر ، على مساوة واحترام ، بعكس عامل وطن .. ليش هو شو عمل للوطن والمواطن ؟؟ نظّف ( زبالته ) .

ناس وناس ..

بواسطة وبعملين ووظيفة حكومية محترمة ” معلّم ” ويرمي بكلمات ” مصدية ” مثل أفكاره و تصرفاته . ترى ما شكل العلم والفكر والتربية التي سيقدمها للأجيال القادمة هذا المحترم !!
ناس .. تحترف الغيرة وضيقة العين وتطالب بتغير وثورة .. تطالب برفع الأجور وتخفيض الأسعار .. تطالب بإلغاء شرطة السير ومخالفاتهم . تطالب بتعينها ( زبالين ) …

وناس ترقب بعين الأسى على وطن لا يحمل همّ مستقبله إلا ّ ثلة قليلة من أبناءه . تكد وتجتهد بمواقعها لتأمين حياة كريمة ورقي فكري وحضاري ومعرفي وأشياء أخرى لجميع البشر على هذا الثرى ..

صوت الراديو : ناس وناس .. يأتيكم يوم ….

وصوتي : نزلني عاليمين .. وأرجوكم يا ناس ” نظفوا قلوبكم من زبالتها ” .

Advertisements

فكرة واحدة على ”ناس وناس

سيتم عرض تعليقاتكم بعد قليل . نشكر تفاعلكم

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s