يوم الغضب الأردني


لا أدري من أين أبدأ .. لتوه صديقي العزيز يوجه إلي دعوة ” فيس بوكيّة ” لقيامي بالمشاركة يوم الجمعة القادم بالتضامن ليوم غضب أردني ..

أخيرا غضب الشعب الأردني .. أو اخيرا سيعبر عن غضبه .. لحظة !!

سيعبر عن غضبه .. يعني ممكن تكسير اشارات ومحلات تجارية و تخريب ممتلكات عامة وخاصة ” ويمكن ومش أكيد يعني حسب توفر افراد أمن عام بمكان وجودك لإنه عليهم ضغط هاليويمن ” يمكن تواجد درك وقوات خاصة واعتقالات وقنابل غاز وطبعا كل الشباب تحت سن 25 سنة بدهم يهتفوا ضد الحكومة .. الله يقويكم .

انا لست بصدد الدفاع عن مواقف ابو زيد وزبانيته .. لكن ما الذي نستفيده إذا ما ” صراخنا جاب نتيجة ” ونجح في اسقــــــــــــــــــاط الحكومة الي ” بنحلم فيه ” … تيتي تيتي … حكومة رحتي وحكومة جيتي ..

وقفة تأمل يا شباب .. إن الغضب لا يؤثر ولا يقدم ولا يفيد .. إن الأردنيين منذ سنوات يعيشون حالة من الكبت والقهر والمضايقات الإقتصادية ” كما باقي دول المنطقة ” فليس حال الجزائر أو مصر ببعيد عنا .. لكن من الذي من مصلحته تاجيج الأزمة وإشعال الجبهة الداخلية … ” ليست نظرية مؤامرة ” بقدر ماهية ثباتنا ووحدتنا وتعاملنا ” بعقلانية ” مقودة للأسف .

والحليم إذا غضب …

فهل إتصفنا بالحلم !! وهل غضبك سيأتي لك بخير !! أم انها فقط فزعة كباقي فزعاتنا الهوجاء مع سبق الإصرار والتبجح بأن رأسنا عنيد و ” مافي حد احسن من حد ” ولازم كل شي بطوشة وبالخاوة . حتى التعامل بالشأن السياسي والديمقراطي ..

يوم غضب عشائري .. حزبي .. شبابي .. يمكنك تسمسته بما شئت إلاّ بأنه اردني ..

لن اقوم بأي عمل ” ……….. ” وسأتابع من بعيد كيف ستهربون من لعنة الغضب . ودمتم وداوم وطني بألف خير . وعذا يا وطني

Advertisements

3 أفكار على ”يوم الغضب الأردني

  1. nihad

    صديقي .. مش قادر افهم موقفك

    فليغضب الشارع الاردني .. ومشان الله والانبياء خليه يغضب ، القضية مش قضية غضب وتكسير ممتلكات خاصة واشارات … الخ
    بعدين اي جبهة داخلية واي عقلانية … شوف شو عم يصير بمعان، شوف شو بصير في الجامعة الاردنية ، شوف المشاجرات العشائرية في كل مكان … فكرك مين وراها هاي؟؟؟
    انا بحكيلك مين وراها وراها الحكومة وادواتو اللي ألو المصلحة الاولى والاخيرة في تفتيت وحدة المجتمع .. هاي هي الجبهة الداخلية اللي خايف عليها !!!
    القضية انو هادا الشعب اذا بضلو ساكت رح يلتعن سلسفيل اللي خلفو
    بفهمش ولا قادر افهم دعوتك للحلم والحكمة وما بعرف ايش يا زلمة لازم الناس تغضب .. بدك تعرف ليش تغضب
    تغضب ضد سياسات الافقار والنهب لجيوب المواطنين
    تغضب ضد سياسات التجويع وخصخصة مؤسسات البلد
    تغضب ضد النهب والفساد والسرقة في مؤسسات الوطن
    تغضب ضد رفع الاسعار ،، ضد تحويل التعليم للاغنياء فقط
    تغضب مشان فقراء البلد في القرى والمخيمات وفي كل الاردن
    تغضب لأنو الاردن ليس للاغنياء فقط
    يا ريتنا نتعلم من الشعوب الحية كيف انتفضت بوجه السياسات الاقتصادية في اليونان وفرنسا وايطاليا.. يا ريت نتعلم من الانتفاضة البطولية للشعب التونسي .

  2. حق الرد :
    مساء الخير .. سبق وقلت في التدوينة ” لست بصدد الدفاع عن ابو زيد وزبانيته .. ” ..
    أعتقد ان لعنة الظلام لن تضيء الطريق والضوء .. لماذا لا يعمل الشباب على الإنخراط في العمل السياسي والحزبي … لماذا اجلس مع احدهم في ازقة الكلية او في حافلة فأشعر انه أمين عام حزب او نائب سابق أو معالي عطوفة الباشا “س” .. وعندما أسأله : عمرك فكرت تنتمي لحزب ؟ بتخربط وبعرفش يرد .

    هذه المدونة أسجل فيها عتبي على أبناء جلدتي ومن هم في سني او أصغر أو اكبر … إحنا شاطرين بالجعجعة ويوم العمل الذي يحتاجه الوطن بنرفع مسؤوليتنا وبدنا كل شي ترسمه الحكومة وتجيبه لعنا .

    مش راضي عن النواب ليش ما تصير نائب وتغير قانون الإنتخاب .
    مش راضي عن الوزارة .. ادرس وابدع ” واعتصم فهو حق دستوري ” وحافظ على الوطن وصير وزير نفتخر فيك ..
    مش راضي وبس … خليك في بيتك لا تطلع وتزعجني .

    مع التنبيه أن الكلام هنا مش الك صديقي نهاد .. على الرحب والسعة

  3. تنبيه: Have Your Say: Are Gov’t Measures to Cut Prices Enough? | شو قولك: هل الإجراءات الحكومية لخفض الأسعار كافية؟ | 7iber Dot Com

سيتم عرض تعليقاتكم بعد قليل . نشكر تفاعلكم

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s