بنت حرام


حرة و نزيهة و شفافة … و بطلعلها تعمل فينا الي بدها إياه … لإنها مش سائلة على حد … وليش تسأل على حد !

بتطلع مع مين ما بدها و بكل مكان بشوفها … الصبح كانت باليادودة وبعد الساعة 10 كانت بجاوا وخريبة السوق وحماينة من الشوب …

بعد الظهر كنت بالمقابلين شفتها بس كانت مسطولة …

قلت براسي : يمكن هاي وحدة بتشبهها ؟

أجاني شيطان الفضول و وسوسلي اتحركش فيها واصاحبها … مين بصحلوا بهالأيام !!

المهم شلحت الباجة و دحشت حالي بينها وبين الواقفات … وبلشت اشمشم خبرها !!

شي بحكي انها بتطلع مع شباب ب30 دينار وشي بقول لأ … أقل من خمسيييييييين ما بتقبل ! وهناك عالزاوية جنب الباص الكيا كان واحد مفتووووول العضلات بحكي أنه بوخدش وحدة وحدة . هع

طلعت من المولد بلا حمص لإني ما كنت حامل ليرات وما بقدر ( افت ) زي صاحبنا …

سحبت حالي وطلعت على سحاب بلكي بطلعي( بحبة ) رمان أو ( بشم الهوا )… يا حسرتي … سحاب كانت صحرا وليل وخيالة

كل ولد سايق ( همر ) وطالع نازل عالمضارب … وفش حد رايق للعبة … يعني الوضع تمام والناس ملتهية بشغلها والله هداها على غير العادة القديمة يا حليمة !

حكيت تلفزيون مع ابو خالد واجا اخدني مشوار ” أنا ما وراي شي طشاااش ” … رحنا على ( الحديد لاند ) ولقيناهم ناصبين بيت شعر قبال القلعة الحديدية وحديد طالع و حديد نازل وحبة فووووق وحبة فوووووووووق كمان .

وسمعني سلام بودعك يا منافس … ابو برجس عالنفس حابس … وحكيت معه كانت مع نوياته عالية جدا …

قيلولة الظهر خلتني اتنشط و ارجع عبلاد العجائب … يا لهول ما رئينا … صاحبتي نزاهة شفافية حرة … بتطلع مع مين ما كان وتركت الشرف على جنب … والي كانت الصبح بتنظر فيه … وكل ما واحد حكى معها كلمة برفع رشاش و بطخلوا مخزنييين ثلاث . نيال أمه

طب فجأة كل العالم صاروا يفوتوا عالمطعم قبل ما يسكر بربع ساعة … ازمة وحفلات ومباركات … شو في يا جماعة

قال : نزاهة تجوزت وسترت على حالها .

انا الفار لعب في عبي … مش معقول !! ما أنا بعيني شفتا بتلعب عالمكشوووووف في دار  أبو ….

و هناك عند أبو الليف كانت متخبية بين الحريم … يا سيدي . صحتييين عالشاطر

المهم أنا وصلتني معلومات أكيدة هه … بقول أكيدة أنه أبو حديد فاز باللعبة وطلع بأطول عمارة وكانت 1200 غرفة في القويسمة الثانوية والطخ للصبح .

وانه فلان وفلان بدهم يستأجروا من عنده طابقين …

انا حمضت الفيلم وروحت عالبيت مبسوط ومنهنه … شغلت الراديو اسمع

طلع حمزة عالهوا قال : فاز ابو زيد والرقاد والهميسات

قلت : يلعن حرمك بنت حرام … نزيهه وحرة وشفافة يا ديمقراطيتنا … يا مكفكة ومفتفة عزوتنا

يالي ما عندك غالي غير الي في بالي .

Advertisements

فكرة واحدة على ”بنت حرام

  1. مهند لبابنة

    والله اقف حائرا في ما كتبت ,,,,,, درجة الابداع غير طبيعية

سيتم عرض تعليقاتكم بعد قليل . نشكر تفاعلكم

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s