مدونة محمد فريج

أول يوم دخلت عالحبس ، كنت مفلّس وما معي ولا نكلة . حق ( الشبشب ) دينارين . قلتلهم معيش ودخلت حافي بعد ما حلقولي زيرو ولبست البجامة الزرقة .

توزيعتي كانت على عنبر ( ج ) ، أول ما دخلت .. بدأ التحقيق من الشباب وعلى أسئلة : شو تهمتك ؟ فساد ؟ قتل ؟ شروع ؟ سرقة ؟؟؟؟ وبلشت أجاوب عقد السؤال عشان أخلص من القرف ، في واحد ما عجبه أسلوبي وبصوت عالي سمعه الكل وقف وقال بقوة : ولا أنت ، إخرس وروح وقف جنب الباب .

قلت : أنا مش ولا . وبحكي شو ما بدي وبوقف وين ما بدي .
قال : شكلك حابب تخسر روحك !!
قلت : ما بقطع الراس الي الي ركبها ، وإذا أنت بدك تقطع راسي فربنا بكون كاتب هيك .

ما عجبه الجواب .. فسلّك معي بأسلوب ثاني وسألني : ليش حافي ؟ ليش ما اشتريت شبشب ؟ قلت : ما معي مصاري.

قال : كيف بدك تدفع بدل تنظيف العنبر ؟ بدنا منك دينار كل أسبوع .
قلت : بنزل بنظف مع الشباب ، ومش حدفع . سكت شوي ، فقام واحد من زلمه وقال : هذا الشب عندي يا كبارة وأنا بدفع عنه .

قلت : ما بدي حد يحطني تحت جناحوا وأنا قلت بنزل بنظف مع الشباب .

عرفت بعدين أنه هالكبارة محكوم من زمان ، يعني عتعوت ،، وفي العنبر في 75 نزيل . و بوخد من كل نزيل في العنبر دينار بدل نظافة وبنزّل هو من عنده ثلاث شباب ينظفوا العنبر وبعطي كل واحد منهم 3 دنانير مصروف بدل تنظيف .. هو بكون حط باقي الــ 75 دينار بجيبته.

الشرطة بتعرف ، أساسا إدارة السجن هي الي بتعين شاويش العنبر .. ومرات بتخانق بعض الفتوات ليصيروا شاويش . مش بس ليصيروا يوخذوا مصاري العالم ويحطوها بجيابهم .. لأ . كمان لأنهم بخلوا النزيل يشعر بالأمن إذا كان بطرفهم وبعطوه سرير منيح وما حد بيجي فيه.

يا ترى ، كم شاويش عنبر في بالبيت والشارع والمدرسة والجامعة والوزارة ، كم شاويش عنبر في بالدولة ؟

* مدونة تحويلة – عن قصة حقيقية